Íþróttavikan hefur hafið göngu sína á nýjan leik en þátturinn verður aðgengilegur á DV.is og í Sjónvarpi Símans. Nýr þáttur verður aðgengilegur alla föstudaga.

Helgi Fannar Sigurðsson, íþróttablaðamaður og sparkspekingurinn Hrafnkell Freyr Ágústsson munu stýra Íþróttavikunni saman. Hjörvar Hafliðason var gestur í fyrsta þætti þeirra félaga.

Chelsea hefur verið í svakalegum vandræðum á þessari leiktíð í ensku úrvalsdeildinni. Liðið er fyrir neðan miðja deild þrátt fyrir að nýr eigandi, Bandaríkjamaðurinn Todd Boehly, hafi eytt yfir 600 milljónum punda í leikmenn á einu ári.

„Ég veit ekki hvað er málið. Þetta er allt á mjög skrýtnum stað,“ segir Hrafnkell.

Hjörvar segir að Chelsea ætti ef til vill að nýta síðustu leikina í að prófa nýja hluti.

„Chelsea er með aðeins of mörg stig til að vera í fallbaráttu. Kannski eiga þeir að hugsa þetta þannig að þeir séu með frítt spil. Á ég að spila 37 ára gömlum hafsent? Eða á ég að spila yngri leikmönnum, blóðga þá og sjá hverjir hafa eitthvað erindi í þetta? Þarf ég að vera með 33 ára gamlan Aubameyang uppi á topp? Það eru margar svona spurningar sem ég myndi spyrja mig ef ég væri Frank Lampard.

Þetta er ótrúlegt fíaskó. Við gerum oft grín að Bandaríkjamönnum sem tala um fótbolta. Að hlusta á Kana tala um fótbolta, manni finnst það ekki meika sense. Todd Boehly er allar stereótýpurnar. Hann talar of mikið, veit ekkert hvað hann er að tala um. Fíflagangur er í boði í Bandaríkjunum en ekki þarna.“

Hrafnkell tekur til máls á ný.

„Chelsea þarf að koma þessum manni í burtu frá því að taka einhverjar ákvarðanir. Fá inn menn sem vita hvað þeir eru að gera og hafa verið í þessu liði. Hann á bara að dæla inn peningum og halda kjafti.“

Líklegt er að Mauricio Pochettino sé að taka við Chelsea en Hjörvar sér lausn félagsins frekar í Portúgal.

„Ég myndi taka Amorim hjá Sporting. Bara einhvern sem mætir fullur af allri heimsins orku. Þú ert að taka séns á leikmönnum, taktu séns þarna líka.“

Umræðan í heild er hér að neðan.