Gylfi Þór Sigurðsson er staddur í Origo-höllinni að Hlíðarenda á leik Vals og Tindastóls í úrslitaeinvígi Subway-deildarinnar í körfubolta karla.
Um fyrsta leik einvígisins er að ræða. Sömu lið léku einnig til úrslita í fyrra en þá hafði Valur betur. Stólarnir freista því að ná fram hefndum í ár.
Gylfi kom aftur hingað til lands á dögunum í kjölfar þess að mál hans í Bretlandi var látið niður falla.
Gylfi fagnar 34 ára afmæli sínu á þessu ári en hann hefur ekki spilað fótbolta í tæp tvö ár. Everton, fyrrum félag hans, setti hann til hliðar eftir að ásakanir á hendur honum komu upp í júlí 2021.
Samningur hans við Everton rann svo út síðasta sumar. Óljóst er hvort Gylfi muni aftur spila fótbolta.
Kappinn virðist allavega í góðum gír í Origo-höllinni í kvöld, eins og sjá má á meðfylgjandi mynd.
