Katarinn Sheikh Jassim gefst ekki upp á að reyna að eignast Manchester United og er hann nú sagður undirbúa nýtt tilboð fyrir kvöldið.
Glazer-fjölskyldan er með United á sölu en aðeins fyrir gott verð. Í kvöld klukkan 21 að íslenskum tíma rennur fresturinn til að bjóða í félagið út. Þetta er þó í þriðja sinn sem slíkur frestur er gefinn.
Sheik Jassim og Sir Jim Ratcliffe hafa hvað helst verið nefndir í tengslum við kaupa á United en tilboð þeirra hafa ekki verið samþykkt hingað til.
Samkvæmt Mirror ætlar Sheikh Jassim nú að bjóða 4,5 milljarða punda í United. Ratcliffe er aðeins sagður til í að borga 4 milljarða punda.
Það er þó ekki víst að tilboðið verði samþykkt þar sem talað hefur verið um að Glazer-fjölskyldan vilji 6 milljarða punda fyrir United.
Munurinn á tilboðum Sheikh Jassim og Ratcliffe er sá að fyrrnefndi aðilinn vill eignast United að fullu en ef tilboð Ratcliffe verður samþykkt munu Joel og Avram Glazer áfram eiga 20 prósent hlut í félaginu. Ratcliffe yrði þá stærsti hluthafinn með 50% en hin 30% færu til annarra fjárfesta.
