Arsenal verður áfram án Frakkans William Saliba í stórleiknum gegn Manchester City á miðvikudag. David Ornstein á The Athletic segir frá þessu.

Skytturnar heimsækja City á miðvikudag. Liðið er með fimm stiga forskot á toppi deildarinnar en Englandsmeistarar City eiga hins veegar tvo leiki til góða.

Hinn 22 ára gamli Saliba meiddist í seinni leiknum gegn Sporting í 16-liða úrslitum Evrópudeildarinnar og síðan hefur Arsenal átt slæman kafla.

Liðið sigraði Crystal Palace og Leeds en hefur svo gert jafntefli við Liverpool, West Ham og Southampton í síðustu þremur leikjum.

Það hafði verið talað um að Saliba ætti möguleika á að ná leiknum gegn City en sá möguleiki hefur verið sleginn af borðinu. Enn fremur er líklegt að miðvörðurinn missi af þarnæsta leik gegn Chelsea líka 2. maí.

Saliba var einn af bestu mönnum Arsenal áður en hann meiddist. Ornstein bendir á tölfræði liðsins með og án Saliba. Er hún ansi afgerandi. Liðið hefur fengið á sig að meðaltali 0,9 mörk í leik með hann innanborðs en 1,8 mörk án hans.

Þá er sigurhlutfall þeirra 77,8 prósent með Saliba en 40 án hans. Arsenal fær jafnframt að meðaltali 2,4 stig í leik með Saliba en 1,8 án hans.