KSÍ er að vinna að því að færa landsleik Íslands og Mexíkó sem fyrirhugaður var þann 11. júní, sex dögum fyrir mikilvægan landsleik gegn Slóvakíu í undankeppni EM 2024.
Åge Hareide er tekinn við íslenska karlalandsliðinu og verða hans fyrstu leikir 17. júní gegn Slóvakíu og 20. júní gegn Portúgal. Báðir eru leikirnir liður í undankeppni EM 2024, þar sem Ísland er með þrjú stig eftir tvo leiki.
Ísland átti að leika við Mexíkó ytra þann 11. júní en ólíklegt er að leikurinn verði þá.
„Hann er ekki af borðinu en við erum að skoða aðra möguleika, að færa þá dagsetningu þannig hann sé ekki að trufla undirbúning fyrir Slóvakíu. Við erum í góðum samskiptum við Mexíkó svo það lítur ágætlega út. Hann (Hareide) vildi að Slóvakía yrði fyrsti leikurinn,“ sagði Jörundur Áki Sveinsson, sviðsstjóri knattspyrnusviðs hjá KSÍ, við 433.is fyrr í dag.
Hareide sjálfur ræddi einnig við 433.is og útskýrði af hverju hann vill ekki spila við Mexíkó þann 11. júní.
„Mér hugnast ekki að ferðast til Mexíkó, í gegnum önnur tímabelti og koma aftur hingað og spila. Ég tel að það sé betra að vera hér heima, æfa og vera viss um hvað við viljum gera.“
