Jóhann Berg Guðmundsson var fyrirliði íslenska landsliðsins í kvöld er liðið laut í lægra haldi gegn Bosníu, 3-0 á útivelli í fyrsta leik liðanna í undankeppni EM. Hann segir varnarleik liðsins í heild sinni hafa orðið því að falli, þétta hefði þurft liðið betur.

„Þetta er auðvitað bara svekkjandi,“ sagði Jóhann í viðtali við Viaplay eftir leik. „Við vildum byrja þessa keppni betur en við gerðum og gáfum á okkur þrjú hálf léleg mörk. Sem lið vorum við ekki nægilega góðir varnarlega og þess vegna skora þeir þessi þrjú mörk. Þeir eru ekki að fá einhver dauðafæri en klára þau færi sem þeir fá ágætlega.“

Hvað var það sem hefði mátt gera betur?

„Við vorum bara aðeins of opnir, við hefðum þurft að þétta liðið betur. Við gerðum það ekki og þeir voru með þessa tvo framherja sem gerðu ágætlega. Við hefðum þurft að þétta liðið töluvert betur.

Hvernig var stemningin í klefanum eftir leik?

„Auðvitað er stemningin ekki góð en við leggjum þennan leik til hliðar. Þetta er ekki úrslitaleikurinn í þessari keppni, auðvitað vildum við koma og byrja betur en við eigum þá eftir í heimaleiknum og þá viljum við auðvitað ná fram hefndum það er klárt. Þetta maraþon er bara rétt að byrja.“