Edin Dzeko 37 ára gamall framherji Inter Milan verður aðalmaðurinn í liði Bosníu er liðið mætir Íslands í undankeppni Evrópumótsins á morgun.
Íslenska liðið kom til Bosníu nú síðdegis en leikurinn fer fram klukkan 19:45 annað kvöld.
„Það er mikilvægt að byrja undankeppnina vel, við erum með tíu leiki fyrir framan okkur og hvert stig skiptir máli,“ segir Dzeko.
„Við viljum byrja á sigri en við þurfum að gera okkar besta til að ná því. Við erum tilbúnir og sjáum hvað gerist.“
Dzeko segir landsliðið augljóslega skipta sig miklu máli. „Það að ég sé hérna 37 ára gamall segir mikið til um þá þýðingu sem landsliðið er fyrir mig. Ég yrði svo glaður að komast í fyrsta sinn með liðið á Evrópumótið, við eigum það skilið. Það er mikilvægt að byrja undankeppnina vel fyrir framan okkar stuðningsmenn.“
„Ég lofa því að allir leikmenn taka þessum leik alvarlega því það er leiðin til sigurs. Þetta verður ekki auðveldur leikur, þetta verða einvígi og kapphlaup.“
