Arnar Gunnlaugsson, þjálfari ríkjandi bikarmeistara Víkings Reykjavíkur var gestur í Íþróttavikunni með Benna Bó ásamt Herði Snævari Jónssyni, íþróttastjóra Torgs.
Meðal þess sem bar á góma var mál íslenska knattspyrnumannsins Alberts Guðmundssonar sem er ekki í landsliðshópi Íslands fyrir fyrstu leiki liðsins í undankeppni EM í knattspyrnu.
Arnar Þór Viðarsson, landsliðsþjálfari Íslands greindi frá því í samtali við fjölmiðla að Albert hefði ekki sætt sig við að þurfa að verma varamannabekk Íslands í fyrsta leik liðsins gegn Bosníu.
Benedikt Bóas, umsjónarmaður Íþróttavikunnar spurði gesti sína af hverju það væri verið að eyða svona miklu púðri í Albert Guðmundsson, leikmann sem hefur jafnan ekki náð því besta fram hjá sér með landsliðinu.
„Hann er stór prófíll og hefur verið stjarna frá unga aldri, eiginleg barnastjarna. Það voru miklar væntingar til hans, hann hefur ekki alveg náð flugi með landsliðinu eins og vonir stóðu til en hvað þetta varðar, voru ekki bara allir að vonast til þess að hann gæti komið inn í þennan hóp og tekið því hlutverki sem hann fær. Verið lykilmaður í einhverjum leikjum, ekki öllum og hjálpað okkur í því dauðafæri, sem þessi riðill er, að fara inn á Evrópumótið. Því staðreyndin er bara sú að við vorum mjög heppin með drátt.
Hann ætlar ekki að vera með, hann og Arnar ná ekki saman, og þá þarf það bara að vera þannig. Arnar er ráðinn inn til þess að vinna ákveðna vinnu og hann hlýtur að gera það sem er best fyrir sig til að halda þeirri vinnu.“
Arnar segir sorglegt að svona sé í pottinn búið.
„Nú náttúrulega veit ég ekkert samskiptin þeirra á milli og þess háttar. En fyrst og fremst, fyrir mig sem knattspyrnuáhugamann, er það bara sorglegt að Albert sé ekki að spila fyrir íslenska landsliðið. Þetta er frábær leikmaður og maður man alltaf eftir því á sínum tíma í KR hjá Willum þegar að Albert kom um sumarið og æfði með liðinu. Þar sá maður tilþrif sem maður sér ekki oft hjá íslenskum knattspyrnumönnum. Fyrst og fremst er það bara mjög sorglegt að hann sé ekki að spila fyrir okkar landslið.“
