Harry Maguire, fyrirliði Manchester United, er stoltur af því að hafa lyft deildarbikarnum á sunnudag þrátt fyrir lítið hlutverk.

Erik ten Hag stjóri Manchester United hefur geymt Maguire á bekknum undanfarna mánuði. „Það er ekkert svekkelsi hjá mér, ég er fyrirliði félagsins og mitt starf er að leiða félagið í átt að árangri. Þetta hefur verið hluti af því,“ segir Maguire.

Maguire spilaði síðustu mínúturnar í sigri United á Newcastle á sunnudag. „Ég er knattspyrnumaður og vill auðvitað spila alla leiki og leiðið liðið út.“

„Ég vil líka hjálpa liðinu, ég er fyrirliði og er með mikla ábyrgð innan sem utan vallar. Það var gott að geta hjálpað þeim.“

„Ég skil að þetta er hluti af þessu þegar þú spilar á meðal þeirra bestu, þetta er Manchester United. Við viljum vinna titla og til þess þarf samkeppni.“

Samkvæmt Maguire eru hann og Ten Hag í miklum samskiptum. „Stjórinn er heiðarlegur við mig, hann talar við mig daglega og hefur trú á mér. Hann segir að ég sé frábær miðvörður sem geti nýst liðinu.“

„Hann og ég erum hins vegar meðvitaðir um að aðrir miðverðir eru að spila vel.“