Anderson, fyrrum leikmaður Manchester United, hefur komið vini sínum Cristiano Ronaldo til varnar.

Ronaldo var gagnrýndur undir lok síðasta árs er hann kvaddi Man Utd og elti peningana í Sádí Arabíu eftir erfitt gengi á Englandi.

Anderson hrósar þó persónunni sem Ronaldo er og segir að fólk einfaldlega þekki ekki manninn sem hann hefur að geyma.

,,Þegar kemur að Ronaldo þá ertu hissa á hverju einasta augnabliki. Hann hugsar 100 prósent um fótbolta,“ sagði Anderson.

,,Leikurinn klárast og þá er hann farin heim til að jafna sig. Hann er frábær atvinnumaður og frábær vinur.“

,,Það eru ekki margir sem vita það en hann er duglegur að hjálpa fólki og er með gott hjarta. Hann skutlaði okkur á æfingar, honum var ekki sama. Hann var mér mjög mikilvægur.“

,,Ef ég hefði jafnvel fimm prósent af hans persónuleika þá væri ég einn besti leikmaður heims. Ég veit það núna.“