Pep Guardiola stjóri Manchester City er öruggur á því að félagið sé saklaust nú þegar enska úrvalsdeildin hefur ákært félagið.
City er ákært í 115 liðum fyrir brot á fjármögnun félagsins í gegnum langt skeið. Óháð nefnd fer yfir ákærurnar og skoðar hvað sé hæft í þessum ásökunum deildarinnar.
„Nú þegar er verið að dæma okkur, það sem gerðist í vikunni er það sama og gerðist hjá UEFA. Við vorum ásakaðir þá en núna eru það ákærur,“ segir Guardiola.
UEFA hafði dæmt City í bann frá Evrópukeppnum vegna svipaðra brota en alþjóðlegur dómstóll sýknaði félagið.
„Félagið hefur sagt mér það áður og sannað að við erum algjörlega saklausir. Af hverju ætti ég ekki að halda að við séum saklausir.“
„Þið verðið að átta ykkur á því að 19 lið í deildinni eru að saka okkur án þess að gefa okkur tækifæri til að verja okkur. Okkar fólk hefur útskýrt allt á síðustu árum, þið vitið hvar ég stend í þessu máli.“
