Helgi Sigurðsson er gestur í nýjasta sjónvarpsþætti 433.is. Hann er í dag þjálfari karlaliðs Grindavíkur í Lengjudeildinni. Í fyrra var Helgi aðstoðarþjálfari hjá stórveldi Vals.

Þegar síðasta tímabil í Bestu deildinni hófst var Heimir Guðjónsson við stjórnvölinn hjá Val. Hann var hins vegar látinn fara á miðju tímabili eftir slæmt gengi og Ólafur Jóhannesson tók við. Helgi vann því með þeim báðum.

„Fyrst og fremst var þetta frábært tækifæri fyrir mig að fá að vinna með Heimi Guðjónssyni, þjálfara sem hefur unnið fullt af titlum. Það var geggjað tækifæri og frábært að fá að vinna með svona manni og læra af honum,“ segir Helgi.

Það gekk þó ekki sem skyldi hjá Val í sumar. Liðið hafnaði í sjötta sæti.

„Væntingarnar til Vals voru miklar, hópurinn stór og sterkur. Auðvitað voru viss vonbrigði að ná ekki meira út úr þeim hóp. Fyrir mig persónulega var svekkjandi að fá ekki að klára þetta tímabil með Heimi, eins og farið var af stað með. Það voru viss vonbrigði en svona er fótboltinn. Menn eru að leggja sig 100 prósent fram og svo kannski ganga hlutirnir ekki og þá er oft bara ein leið í þessu. Því miður fór hann á miðju sumri. Það var mjög fúlt að ná ekki að klára tímabilið með honum.“

Helgi segist þó taka gríðarlega mikið frá tíma sínum með Heimi og Ólafi hjá Val.

„Að vinna með tveimur af þeim þjálfurum sem hafa unnið hvað flesta titla, sjá hvernig þeir vinna og sjá hlutina, var náttúrulega gríðarleg reynsla fyrir mig. Það er reynsla sem ég mun búa að til framtíðar.

Þó árangurinn hafi ekki verið góður innan vallar gerir þetta mig að mun betri þjálfara. Það er margt sem ég get tekið frá þeim báðum.“

Hér að neðan má horfa á þáttinn í heild, og enn neðar hlusta á hann í hlaðvarpsformi.