Manchester City fagnar því að málefni félagsins verði skoðuð að óháðri nefnd. Búið er að ákæra félagið í yfir 100 liðum af ensku úrvalsdeildinni. Rannsókn hefur staðið yfir í fjögur ár en ákærurnar voru birtar í dag. Í yfirlýsingu segir að meint brot hafi átt sér stað frá 2009 til ársins 2018.
„Félagið er grunað um að hafa ekki skilað af sér réttum upplýsingum þegar kemur að tekjum, tengdum aðilum og kostnaði,“ segir í yfirlýsingu deildarinnar.
Á þessum tíma varð City meðal annars enskur meistari í þrígang. Möguleiki er á því að félaginu verði refsað með því að stig verði tekin af því.
City er sakað um að hafa farið frjálslega með sannleikann þegar kemur að styrkarsamningum og samningum við leikmenn.
Árið 2020 dæmdi UEFA enska félagið í bann frá Meistaradeildinni fyrir brot á sömu reglum, þeim dómi var áfrýjað til íþróttadómstólsins, CAS, og látinn niður falla.
City getur hins vegar ekki áfrýjað þeirri refsingu sem það gæti átt yfir höfði sér frá ensku úrvalsdeildinni til CAS, vegna reglna deildarinnar.
Yfirlýsing Manchester City:
Manchester City er undrandi á ákæru þessara meintu brota á reglum úrvalsdeildarinnar, sérstaklega í ljósi þeirra miklu þátttöku félagsins í rannsókninni og mikla magns af ítarlegum gögnum sem deildin hefur fengið.
Klúbburinn fagnar því að óháð nefnd skoði þessi mál og að hún taki óhlutdrægt til athugunar óhrekjanleg sönnunargögn.
Sem slík fögnum við því að þetta mál verði klárað í eitt skipti fyrir öll.
