Chris Wheeler, blaðamaður á Daily Mail, hefur ritað pistil í kjölfar þess að ákærur gegn Mason Greenwood, leikmanni Manchester United, voru látnar niður falla í gær. Hann segir stöðuna ansi erfiða fyrir félagið.
Greenwood hefur ekki spilað fótbolta í meira en ár í kjölfar þess að hann var ákærður fyrir tilraun til nauðgunar, stjórnandi hegðun og líkamsárás, allt gegn fyrrverandi kærustu sinni Harriet Robson.
Nú hefur allt hins vegar verið látið niður falla. Hins vegar er ekki ljóst hvað tekur við hjá Greenwood á knattspyrnuvellinum, eða hvort.
„Raunin er sú að sú staðreynd að Greenwood sé mögulega til taks eftir að ákærur á hendur honum voru látnar niður falla er martröð. Félagið á í hættu að stíga inn á siðferðislegt jarðsprengjusvæði,“ skrifar Wheeler.
Hann segir menn innan félagsins hafa óttast þessa niðurstöðu. „Síðustu tólf mánuði hafa heimildamenn félagsins sagt okkur að það versta sem gæti komið út úr þessu væri að málið væri látið niður falla eða að Greenwood yrði ekki fundinn sekur fyrir rétti. Óttin við þetta rættist í hádeginu í gær.“
Wheeler bendir á að hljóðklippa af Greenwood sem Robson tók upp er hann beitti hana ofbeldi sé enn til staðar.
„Þó svo að Greenwood standi ekki lengur frammi fyrir ákærum væri rangt að segja að hann væri ekki sködduð vara. Hljóðklippan sem hratt þessu af stað hefur skemmt orðspor hans, sem og félags hans, frá upphafi.“
Wheeler setur stórt spurningamerki við skilaboðin sem það myndi setja að leyfa Greenwood að spila fyrir United á ný.
„United á stuðningsmannaher um allan heim, fjölda styrktaraðila og, ekki gleyma, kvennalið. Hvers konar skilaboð myndi það senda að leyfa Mason Greenwood að hlaupa um Old Trafford í treyju félagsins á ný?
Svo eru það liðsfélagar hans. Einhverjir þeirra hættu að fylgja honum á samfélagsmiðlum í kjölfar þess að hann var handtekinn. Flestir eru feður, margir með dætur. Er hægt að ætlast til þess að þeir bjóði hann velkominn til baka með opnum örmum eftir að þeir heyrðu hljóðklippuna?“
Það er óljóst hvað tekur við hjá Greenwood.
„Skipti út fyrir landsteinana hafa verið í umræðunni. Það gæti verið besti möguleiki Greenwood til að sanna sig upp á nýtt. Hver ætlar samt að segja að þetta elti hann ekki þangað. Það er engin auðveld leið áfram fyrir United og Greenwood. Það vinnur enginn í þessu.“
