Jorginho gekk fyrr í kvöld í raðir Arsenal frá Chelsea.
Miðjumaðurinn, sem er 31 árs gamall, skrifar undir eins og hálfs árs samning á Emirates með möguleika á árs framlengingu.
Arsenal greiðir Chelsea 11 milljónir punda fyrir Ítalann. Ein milljón bætist við kaupverðið ef Arsenal nær topp fjórum í ensku úrvalsdeildinni og önnur milljón ef liðinu tekst að halda í toppsætið og verða Englandsmeistari.
„Jorginho er miðjumaður sem er klár, með mikla leiðtogahæfni og mikla reynslu úr ensku úrvalsdeildinni,“ segir Mikel Arteta, stjóri Arsenal.
„Hann hefur unnið mikið á ferlinum en hefur enn hungur til að gefa af sér hér.“
Jorginho tjáði sig sjálfur. „Þetta er ótrúlegt félag og ég er svo spenntur fyrir því að vera hérna.
Ég mun reyna að hjálpa með reynslunni sem ég hef öðlast hjá öðrum félögum. Ég mun gera hvað sem er til að hjálpa liðinu að ná enn lengra, það er mitt markmið. Ég get lofað því að ég mun gefa allt sem ég á fyrir þetta félag.“
Samningur Jorginho við Chelsea var að renna út í sumar.
Jorginho hafði verið á mála hjá Chelsea síðan 2018. Hann vann Meistaradeild Evrópu með liðinu 2021 og Evrópudeildina 2019.
