Íslenska landsliðið sýndi hetjulega baráttu gegn Albaníu á útivelli í Þjóðdeildinni í kvöld þegar liðið jafnaði leikinn á 96 mínútu. Aron Einar Gunnarsson var rekinn af velli á tíundu mínútu.

Aron Einar lenti í eltingaleik við sóknarmann Albaníu og braut af sér. Eftir að dómari leiksins skoðaði atvikið í VAR-skjánum rak hann Aron af velli.

Albanir tóku svo forystuna í leiknum á 35 mínútu þegar Ermir Lenjani skallaði knöttinn í netið á fjærstöng.

Íslenska liðið átti fína spretti í leiknum og síðari hálfleikurinn var vel spilaður, það skilaði sér á sjöttu mínútu í uppbótatíma þegar Mikael Neville Anderson skoraði.

Hörður Magnússon íþróttalýsandi Viaplay var á vellinum og heyrði Alfreð Finnbogason tala við samherja sína í klefanum.

„Svona verða lið til,“ sagði Alfreð í klefanum við samherja sína eftir leikinn í Tirana.

Ummæli Alfreðs voru rædd á Viaplay af fyrrum samherjum Alfreðs. „Það er margt til í því, fótbolti er leikur klisjanna,“ sagði Rúrik Gíslason.

Kári Árnason brosti. „Hann hendir heldur betur í klisju inn í klefa,“ sagði Kári léttur.