Manchester United hélt að félagið væri við það að krækja í Jude Bellingham frá Birmingham áður en miðjumaðurinn ungi hélt til Dortmund sumarið 2020 fyrir 25 milljónir punda.
Hinn 19 ára gamli Bellingham hefur staðið sig frábærlega með Dortmund undanfarin ár og er talið líklegt að hann fari í stærra félag næsta sumar.
Real Madrid, Liverpool, Manchester City, Manchester United og Chelsea hafa öll áhuga á enska miðjumanninum og gætu reynt að fá hann.
Bellingham var hins vegar í viðræðum við United árið 2020 og fór meðal annars á æfingasvæði félagins að sögn sendiherra þess, Bryan Robson.
„Því miður fyrir okkur ákvað hann að fara til Þýskalands. Við héldum að við værum nánast komnir með hann. Ég, Sir Alex Ferguson og Eric Cantona hittum hann allir með mömmu hans og pabba,“ segir Robson, sem er fyrrum leikmaður United.
