Sænska félagið Gautaborg var með útsendara á sínum snærum á Íslandi á dögunum. Sá hann leiki í Bestu deild karla, þar sem hann fylgdist með nokkrum leikmönnum. Það var greint frá þessu í hlaðvarpsþættinum Dr. Football í gærkvöldi.
Hrafnkell Freyr Ágústsson sparkspekingur segir frá því að njósnarinn hafi séð nokkra leiki í þarsíðustu umferð Bestu deildarinnar. Hann var til að mynda á leik Stjörnunnar gegn Keflavík og Víkings Reykjavík gegn ÍBV.
Þar heilluðu tveir leikmenn sérstaklega, vinstri bakvörðurinn Logi Tómasson hjá Víkingi og Adam Ægir Pálsson, sem leikur aðallega á kantinum hjá Keflavík, að láni frá Víkingi.
„Honum leist á Adam Ægi Pálsson og Loga Tómasson, ásamt fleirum. Þetta er auðvitað bara áhugi og það er langt á milli áhuga og tilboðs,“ segir Hrafnkell.
Adam hefur skorað þrjú mörk í deildinni í sumar en Logi sex.
Hrafnkell bendir á að Gautaborg gæti vel verið að leita að bakverði, en hinn 36 ára gamli Oscar Wendt spilar þá stöðu hjá liðinu í dag.