Gerard Pique, miðvörður Barcelona, ætlar að samþykkja að lækka laun sín hjá félaginu enn frekar til að létta undir með því í þeim fjárhagsvanda sem það er í. The Athletic segir frá.
Þrátt fyrir fjárhagsvandræði hefur Barcelona fengið til sín leikmenn á borð við Robert Lewandowski, Raphinha og Jules Kounde í sumar, svo eitthvað sé nefnt.
Félaginu hefur ekki tekist að skrá leikmennina ennþá vegna fjárhagsvandans. Því hefur það farið ýmsar leiðir til að skapa tekjur. Það hefur til að mynda selt 25% af sjónvarpstekjum sínum næstu 25 árin til Sixth Street.
Pique samþykkti að laun hans yrðu lækkuð síðasta sumar og nú mun hann gera það aftur. Samningur hans við Börsunga gildir í tvö ár til viðbótar og breytist það ekki með launalækkuninni.
Barcelona mun hefja leiktíðina heima fyrir er liðið mætir Rayo Vallecano um helgina.