Enska úrvalsdeildin hefst með pompi og prakt á morgun og ljóst er að áhugamenn um enska boltann eru orðnir ansi spenntir. Enginn er sennilega þó spenntari en athafnamaðurinn Reynir Bergmann sem fékk útrás fyrir hana með einu rosalegasta húðflúri seinni tíma. Reynir er gallharður stuðningsmaður Liverpool og hefur eins og margir þeirra lítið álit á erkifjendunum í Manchester United.
Reynir fékk sér því húðflúr á rasskinnina/lærið þar sem sjá má einfalda fígúru ganga örna sinna og er afraksturinn yfirlýsingin „Ég hata Manchester United.“
Óhætt er að gera ráð fyrir því að skiptar skoðanir verði um ágæti húðflúrsins og sjálfur virðist Reynir vera enn á báðum áttum.
„Helvítis hvatvísin kom þessu beint á rassgatið á mér,“ skrifar kappinn á Facebook-síðu sinni. Vinur hans bendir honum þó á að hvað sem öðru líður þá sé hann hér eftir með „Man Utd“ á rassinum á sér þó vissulega sé það umkringt skít!
