Arnar Grétarsson, þjálfari KA, fékk að líta rauða spjaldið í lok leiks gegn KR í Bestu deild karla í gær. Leiknum lauk með 0-1 sigri KR.
Heimamenn voru ekki ánægðir með Egil Arnar Sigurþórsson í leiknum. Vildu þeir til að mynda fá vítaspyrnu þegar Atli Sigurjónsson, miðjumaður KR, virtist brotlegur innan eigin vítateigs undir lok leiks. Arnar fékk að líta rauða spjaldið eftir að hann bað um víti í því tilviki.
Alls ekkert hátt upp með fótinn þarna. pic.twitter.com/1zsBFawVG6
— Rikki G (@RikkiGje) August 2, 2022
Arnar var spurður út í dómgæsluna í viðtali við Stöð 2 Sport eftir leik og rauða spjaldið sem hann fékk.
,,KR-ingarnir voru búnir að vera tuðandi í fjórða dómaranum allan leikinn, kollegi minn Rúnar, hann fær nú gula spjaldið fyrir eitthvað tuð. Við vorum ekki að kalla hálfviti eða fáviti eða neitt, við vorum bara að biðja um vítaspyrnu. Þegar það eru fjórðu dómarar sem hafa enga tilfinningu fyrir leiknum þá færðu svona móment. Hann er bara ekki klár í þetta hlutverk,“ sagði Arnar Grétarsson eftir leik.
