Magnað atvik átti sér stað í 2-1 sigri Selfoss gegn Þór í síðustu viku. Erlendur Eiríksson, dómari leiksins, rak þá rangan mann af velli.

Orri Sigurjónsson braut á Hrovje Tokic en Erlendur rak Hermann Helga Rúnarsson af velli.

Þórsarar voru eðlilega reiðir út í Erlend og reyndu að tala við hann en það bar engan árangur.

„Þetta var gjörsamlega galið, en maður vorkennir Erlendi smá. Það sást greinilega að hann týndi bara manninum. Svo var hann kominn í algjört rugl og ákvað bara að gefa einhverjum rautt spjald,“ segir Hrafnkell Freyr Ágústsson sparkspekingur í nýjasta markaþætti Lengjudeildarinnar.

„Ég ræddi við nokkra fróðari menn í dómarafræðunum. Þeir segja að þegar svona gerist þá þurrkist oft bannið út alveg, það bara fari enginn í bann. Mér finnst mjög skrýtið að KSÍ hafi ekki gripið til þeirra ráða,“ segir Hrafnkell.

Það kom þó aldrei til greina að staðan sem Hrafnkell nefnir kæmi upp. 433.is fékk það staðfest að Þór hafi haft samband við dómarastjóra KSÍ eftir leik en fékk þær upplýsingar að nánast ómögulegt yrði að fá banninu aflétt eða breyta dómnum.

Hér fyrir neðan má sjá atvikið sem um ræðir.