Christophe Galtier, nýr stjóri Paris Saint-Germain, getur varla talað betur um sóknarmanninn magnaða Lionel Messi.

Galtier tók við PSG í sumar og fær nú að vinna með Messi í París en hann er af mörgum talinn sá besti frá upphafi.

Galtier hefur nú tjáð sig um hvernig það er að vinna með Argentínumanninum og hafði ekkert nema góða hluti að segja.

,,Ég get ekki verið hissa yfir því hversu góður hann er því þegar þú ert með þessa tölfræði, þessa titla og svo marga leiki þá er að því þú ert frábær atvinnumaður,“ sagði Galtier.

,,Leo mætir á allar æfingar, er hluti af liðinu, brosir og talar við liðsfélagana. Hann er hvatning fyrir okkar leikmenn og ég nýt þess að horfa á hann á velli í hvert einasta skipti því hann er fyrirmynd.“

,,Hann hefur unnið allt en rétt missti af HM. Ég held að hann sé ánægður og þegar Leo brosir þá brosa allir. Hann er elskaður og dáður.“