KA hefur tekið ákvörðun um að áfrýja fimm leikja banninu sem Arnar Grétarsson var dæmdur í. Þetta staðfestir Sævar Pétursson framkvæmdarstjóri KA við 433.is.
Arnar fær bannið fyrir að orð sem hann lét falla í garð Sveins Arnarssonar, fjórða dómara í leiknum. Hann hafði fengið rautt spjald í leiknum og því sjálfkrafa tveggja leikja bann. Aga- og úrskurðarnefndin bætti svo þremur leikjum við fyrir eðli brotsins.
„Við ætlum að áfrýja málinu, á meðan málið fer fyrir áfrýjunardómstól þá tjáum við okkur ekki meira um það,“ sagði Sævar við 433.is.
Sævar segir að Sveinn hafi skilað inn auka skýrslu um samskipti sín við Arnar en hann hefur ekki fengið að sjá hana.
Sögur eru á kreiki um að Arnar og Sveinn hafi átt í samskiptum degi eftir leik en KSÍ hefur ekki enn birt dóminn í heild.