Sparkspekingurinn Kristján Óli Sigurðsson segir að tvö af stærstu félögum Íslands í fótboltanum eigi lítið af peningum í bankabókinni.

Þetta kom fram í hlaðvarpsþættinum Þungavigtin í dag. „Það er vesen á tveimur risaliðum í Bestu deildinni, það eru FH og KR. Það er lítið til á bankabókinni, það kemur ekki lítið á óvart hjá FH enda ekki í Evrópukeppni, KR búnir sennilega að eyða Evrópupeningum sem þeir fá svo í haust,“ segir Kristján.

Bæði KR og FH hafa verið mikil vonbrigði í Bestu deildinni í sumar en hafa ekki styrkt leikmannahópa sína í glugganum sem lokast á morgun.

„Það er ekki skrýtið að liðin séu ekki að styrkja sig í glugganum því það er ekki til ein einasta króna,“ sagði Kristján Óli.

FH rak Ólaf Jóhannesson úr starfi þjálfara á dögunum en hann fær borgað næstu þrjá mánuðina. „Ég get staðfest það að Óli Jó fékk þriggja mánaða uppsagnarfrest í Krikanum og fékk fyrsta mánuðinn greiddan. Þeir þurfa hafsent en hafa ekki efni á því.“