Aga- og úrskurðarnefnd KSÍ úrskurðaði í gær Omar Sowe framherja Breiðabliks í tveggja leikja bann vegna olnbogaskots í leik gegn Leikni í lok maí.
Fótbolti.net fjallar um málið og segir að Omar hafi verið dæmdur í tveggja leikja bann fyrir að gefa Brynjari Hlöðverssyni olnbogaskot.
Dómari leiksins tók ekki eftir atvikinu en Klara Bjartmarz framkvæmdarstjóri KSí sendi myndbandsupptöku á aganefndina sem úrskurðar Omar í tveggja leikja bann.
„Er það mat nefndarinnar að atvik það sem vitnað er til í greinargerð framkvæmdastjóra frá 31. maí sl. og jafnframt birtist á myndskeiði sem fylgir með greinargerð framkvæmdastjóra, sé alvarlegt agabrot. Atvik hafi hvorki dómari né aðstoðarmenn hans séð,“ segir í úrskuði nefndarinnar.
Sowe er á láni hjá Breiðablik frá New York Red Bulls og hefur skorað tvö mörk fyrir Blika í Bestu deildinni.
