Íslenska karlalandsliðið tók á móti því albanska í Þjóðadeild UEFA á Laugardalsvelli í kvöld.

Fyrsti stundarfjórðungur leiksins var fremur jafn. Ísland var meira með boltann en Albanir fengu nokkrar hornspyrnur á þessum kafla þar sem þeir gerðu sig líklega.

Fyrsta færi Íslands fékk Arnór Sigurðsson á 19. mínútu þegar boltinn datt fyrir fætur hans eftir langt innkast Harðar Björgvins Magnússonar. Skot hans var hins vegar varið.

Á 30. mínútu komust gestirnir yfir þegar Taulant Seferi náði frákasti og skoraði af stuttu færi. Einhverjir munu setja spurningamerki við Rúnar Alex Rúnarsson í marki Íslands í þessu tilviki.

Albanir tóku stjórn á leiknum út fyrri hálfleikinn eftir þetta, að undanskilinni góðri sókn Íslands skömmu eftir markið sem liðið náði þó ekki að gera sér mat úr.

Íslenska liðið kom mjög öflugt til baka inn í seinni hálfleik. Það fór svo að Jón Dagur Þorsteinsson jafnaði á 50. mínútu. Eftir góða sókn Íslands datt boltinn, fyrir nokkra heppni, fyrir fætur Jóns Dags sem skoraði.

Fyrstu mínúturnar eftir markið var Ísland áfram mun betri aðilinn en svo róaðist leikurinn aðeins. Íslenska liðið átti nokkrar góðar sóknir en vantaði aðeins upp á ákvarðanatöku á síðasta þriðjungi vallarins oft á tíðum.

Meira var ekki skorað og lokatölur 1-1. Ísland er með tvö stig í riðlinum eftir jafnmarga leiki. Albanir eru með eitt stig en þetta var þeirra fyrsti leikur.