Wojciech Szczesny, markvörður Juventus, horfir til Spánar eftir að samningi hans við ítalska félagið lýkur.

Szczesny gekk í raðir Juventus árið 2017 en hann var til að byrja með varaskeifa fyrir Gianlugi Buffon sem er enn að hjá Parma á fimmtugsaldri.

Á þessum fimm árum hafa gríðarlega margir markmenn verið orðaðir við stöðu Szczesny en hann hefur haldið sínu sæti þrátt fyrir ákveðið mótlæti.

Pólverjinn veit að hann mun ekki spila eins lengi og Buffon og vill reyna fyrir sér á Spáni áður en ferillinn tekur enda.

,,Ég er Wojciech Szczesny, ekki Gianluigi Buffon, ég mun ekki spila eins lengi og hann,“ sagði markmaðurinn við pólska miðla.

,,Planið mitt er að klára samninginn hjá Juventus og svo kannski spila í tvö ár til viðbótar á Spáni.“

,,Ég er með samning til þriggja ára og ef þeir vilja mig hér áfram vil ég virða þann samning. Það eru svo margir markmenn sem hafa verið orðaðir við mína stöðu en ég hef vanist því.“

,,Nú hef ég áhyggjur þegar þeir eru ekki að tala um nýjan markvörð Juventus.“