Ousmane Dembele er nálægt því að gera nýjan samning við Barcelona ef marka má frétt AS.
Það má segja að mál sóknarmannsins hafi tekið U-beygju á síðustu mánuðum. Í desember vildi Dembele alls ekki skrifa undir nýjan samning en afstaða hans hefur nú breyst.
Samningur Dembele við Börsunga er að renna út. Chelsea sá sér leik á borði og var sagt hafa áhuga á að næla í leikmanninn frítt. Nú er hins vegar útlit fyrir að svo verði ekki og að leikmaðurinn verði áfram á Nývangi.
Dembele kom til Barcelona frá Dortmund árið 2017 en hefur ekki staðið undir væntingum.