Þór/KA fékk Keflavík í heimsókn í Bestu deild kvenna í kvöld. Leiknum lauk með 3-2 sigri heimakvenna.
Tiffany Janea McCarty kom Þór/KA yfir með skalla tveimur mínútum fyrir lok fyrri hálfleiks og Sandra María Jessen bætti við forystuna, einnig með skalla, á 53. mínútu.
Vigdís Lilja Kristjánsdóttir minnkaði muninn fyrir Keflavík 11 mínútum síðar en Margrét Árnadóttir kom heimakonum í Þór/KA aftur í tveggja marka forystu á 72. mínútu eftir frábæra sendingu frá Tiffany.
Keflvíkingar voru ekki hættir og Caroline McCue Van Slambrouck minnkaði muninn í 3-2 á 77. mínútu en nær komust gestirnir ekki.
Bæði lið hafa átt misjöfnu gengi að fagna það sem af er leiktíðar en Þór/KA fer upp fyrir Keflavík með sigrinum í kvöld og er með níu stig eftir sjö leiki. Keflavík er áfram með sjö stig.