Brasilíski lögfræðinguinn Rafaela Pimenta hefur tekið við stjórnartaumunum á umboðsskrifstofunni sem umboðsmaðurinn umdeildi Mino Raiola hafði byggt upp. Raiola lést þann 30. apríl síðastliðinn og þetta var hans hinsta ósk til samstarfskonu sinnar.
Þar með eru málefni nokkurra af skærustu knattspyrnustjörnum heims komin í hennar hendur, leikmenn á borð við Erling Braut Haaland, Paul Pogba og Zlatan Ibrahimovic. Það verður því nóg að gera hjá henni í tengslum við Pogba en búist er við því að hann yfirgefi herbúðir Manchester United þegar að samningur hans við félagið rennur út í sumar.
Pimenta hafði verið hægri hönd Raiola í rúm 18 ár þegar að hann féll frá eftir erfið veikindi. Bæði var hún honum til halds og trausts en veitti honum einnig ráðleggingar í ýmsum málum er tengdust leikmönnum hans.
