Það var mikið fjör á Hlíðarenda í kvöld þegar Valur tók á móti KR í stórleik í Bestu deild karla.
Valur fór með 2-1 sigur af hólmi í skemmtilegum leik. Kjartan Henry Finnbogason kom KR yfir á 18. mínútu. Patrick Pedersen jafnaði fyrir heimamenn undir lok fyrri hálfleiks. Það var svo Jesper Juelsgard sem gerði sigurmarkið þegar 20 mínútur lifðu leiks.
,,Mér fannst þetta sanngjörn úrslit,“ sagði Heimir Guðjónsson, þjálfari Vals, eftir leik. Fyrir utan fyrstu 15 mínútur leiksins sagði hann sína menn hafa verið betri. ,,Ef þú ætlar að vinna KR þá eru ákveðin grunnatriði leiksins sem þurfa að vera í lagi, eins og seinni boltar. Við vorum ekki að gera það nógu vel. Eftir það náðum við góðum tökum á leiknum og í seinni hálfleik fyrir utan kannski uppbótartíma fannst mér bara vera eitt lið á vellinum. Við spiluðum virkilega vel, létum boltann ganga, sköpuðum færi. Þetta var góð liðsheildarframmistaða. Ef þú ætlar að vinna KR þá þarftu að hafa hana.“
Hann segir mark Pedersen skömmu fyrir hálfleik hafa breytt miklu. ,,Það hjálpaði okkur inn í seinni hálfleik. Menn stöppuðu stálinu í hvorn annan í hálfleiknum.“
KR-ingar voru ósáttir með Helga Mikael Jónasson, dómara leiksins í kvöld. Helgi gaf Grétari Snæ Gunnarssyni til að mynda rautt spjald í lok leiks. Heimi fannst dómgæslan góð. ,,Mér fannst hann dæma vel. KR-ingar spiluðu við Breiðablik um daginn og það átti að vera einhver aukaspyrna í markinu sem Breiðablik skoraði. Ég horfði á þetta og það átti aldrei að vera nein aukaspyrna.“
,,Það dæmir sig sjálft, svona gerir maður ekki.“
