„Þetta er búið að vera æðislegt, að komast almennilega í gang aftur. Þetta var langur tími í Milwall þar sem ég var ekki nálægt því að vera reglulega í alvöru fótbolta. Svo er algjör plús að byrja svona vel,“ segir Jón Daði Böðvarsson framherji Bolton og íslenska landsliðsins á blaðamannafundi á Spáni í dag.

Jón Daði yfirgaf Milwall í janúar og gekk í raðir Bolton þar sem hann hefur blómstrað. Jón Daði segist hafa endurupplifað ást sína á fótbolta í Bolton.

„Það er alveg hægt að segja það, ég get viðurkennt að það voru tímabil í Milwall sem efaðist um þetta hvort ástríðan væri ennþá til staðar. Maður var bara að mæta á æfingar og ekki spila leiki, þess vegna var svo gott að komast annað. Maður fékk spark í rassgatið að þurfa að standa og með því, þegar það gengur vel þá vaknar ástríðan af alvöru. Mér líður eins ég sé endurvakinn, ég er að njóta mín meira en áður fyrr á vellinum.“

Bolton leikur í þriðju efstu deild Englands en Jón Daði hafði spilað fyrir þrjú félög í næst efstu deild Englands.

„Það er kannski örlítill munur. Gæðin eru eitt af því sem þú tekur kannski eftir með liðin í neðri hlutanum, enski fótboltinn er alltaf mikll iðnaður og læti. Síðan er meira um erfiðara velli til að spila fótbolta eins og við í Bolton viljum við gera.“

Eiður Smári Guðjohnsen, Guðni Bergsson, Grétar Rafn Steinsson og Arnar Gunnlaugsson hafa allir skilið eftir gott orð fyrir Íslendinga hjá Bolton.

„Maður finnur fyrir ást á Íslendingum, maður fer í þessa leiki. Það eru 5-6 íslenskir fánar á vellinum, maður heyrir reglulega frá fólki í klúbbnum tala um leikmennina sem voru áður fyrr, á mjög jákvæðan hátt. Maður finnur fyrir því hversu mikið fótboltasamfélag, maður er stoppaður reglulega af fólki fyrir mynd eða spjalla um fótbolta. Þétt samfélag, gaman að vera í þannig umhverfi.“

Íslenska landsliðið tekur nú tvo æfingaleiki gegn Finnlandi og Spáni sem Jón Daði vonast að nýtist vel.

„Það er mjög gott að fá þessa æfingaleiki. Koma okkur meira saman sem lið, við erum búnir að vera að tala um það frá síðasta ári sem við getum bætt. Þetta er hægt og rólega á leið í rétta átt, þetta er mjög jákvætt. Góðir mótherjar að mæta, Spánn er gífurlega sterk þjóð. Jákvætt og erfitt próf.“

„Þetta er öðruvísi, liðið er töluvert mikið breytt. Það er kynslóðaskipti í gangi, ungir leikmenn komnir í þetta. Þeir þurfa að sýna það strax að þeir séu í þessu af alvöru, þetta er mjög spennandi hæfileikar að koma í gegn. Það er mikilvægt fyrir alla og ég held að þeir viti það allir að aldurinn er ekki allt, við erum að þróa liðið og það tekur alltaf smá tíma. Við viljum ná árangri sem allra fyrst, maður finnur það í öllum hópnum.“