Þurr gervigrös voru til umræðu í Íþróttavikan með Benna Bó sem var á dagskrá Hringbrautar. Magnús Már Einarsson, þjálfari Aftureldingar og fyrrum ritstjóri Fótbolta.net, mætti í settið ásamt Herði Snævari Jónssyni, íþróttastjóra Torgs og fóru yfir gervigrösin á Íslandi sem sum hver eru skraufþurr og óboðleg, jafnvel í bumbubolta.
„Það þarf að hætta að horfa á ár þegar kemur að því að skipta um gervigrös heldur notkun. Þetta er í notkun frá morgni til kvölds.“
Hann bendir á að viðhaldið sé ekki gott. „Það er ekki vökvað og það er lélegt viðhald. Með því að vökva færðu hraðari og skemmtilegri leik og minnkar líkurnar að menn festist í grasinu.
Það er enginn mannvirki notuð af jafn mörgum í jafn langan tíma á árinu og gervigrös. Ef þetta er ekki í notkun á æfingum þá eru krakkarnir að leika sér alltaf og svo bumbuboltinn á kvöldin. Þetta byrjar á morgnanna og er í notkun allan sólahring.
Að vera með gervigras, þá þarf að skipta um það reglulega til að halda gæðunum og minnka slysahættu,“ segir Magnús.
Hörður benti á að oft sé ákvörðun tekin um gervigrös af pólitíkusum. „Ég fer inn í Fífuna nokkrum sinnum í viku með dóttur mína og það er krakki á hverjum einasta sentimetri á vellinum. KSÍ þarf að herða regluverkið og það þarf að vera meira eftirlit frá knattspyrnuhreyfingunni þannig höllunum yrði þá hreinlega lokað eða það væru einhver viðurlög að vera með óboðlegar aðstæður.
Það er eins gott að stuðningsmenn KA og Þórs láti vita í kjörklefanum, það eru kosningar í maí, að setja pressu á fólkið sem ræður bænum að rífa sig í gang.“
Nánari umræðu um slysagildrurnar á skraufþurru gervigrasi má sjá hér fyrir neðan.