Jóhann Berg Guðmundsson og félagar í Burnley sitja á toppi Champiohnship deildarinnar þegar deildin er hálfnuð. Jóhann Berg hefur spilað 19 af 23 deildarleikjum.

Jóhann missti af stórum hluta síðasta tímabils vegna meiðsla en undirbýr sig nú fyrir leik gegn Manchester United í deildarbikarnum á morgun.

„Þetta hafa verið nokkur erfið ár svo fyrir mig að vera á vellinum eins mikið og hægt er og á æfingum eins mikið og hægt eru forréttindi fyrir mig,“ segir Jóhann Berg sem er 32 ára gamall.

„Ég er ekkert að yngjast, ég vil njóta þess að vera á vellinum og hjálpa liðinu. Það er það sem ég hef reynt að gera, þegar við vinnum svo leikina þá hjálpar það til.“

Jóhann heldur svo áfram. „Mér líður mjög vel, vinnan bak við tjöldin með starfsfólkinu hefur verið frábær í að hjálpa mér að komast aftur á sama stað. Ég veit hvað ég get og ég get enn bætt í, ég var lengi frá svo ég hef þurft að komast í takt og venjast nýjum leikstíl. Liðið er að breytast og við sem leikmenn með.“

Jóhann var frá í átta mánuði á þessu ári eftir alvarleg kálfa meiðsli. „Þetta er mjög erfitt, sérstaklega þegar þú meiðist og kemur til baka og meiðist strax aftur. Andlega var þetta verulega erfitt.“

„Ég hugsaði aldrei að ég myndi ekki ná bata, ég er nokkuð sterkur andlega og sumir hefðu kannski átt í meiri vandræðum. Ég á mjög góða fjölskyldu sem hjálpaði mér mikið. Ég á enn aðeins inni til að komast í mitt besta form, þessa stundina er allt á leið í rétta átt,“ segir Jóhann um stöðuna.