Lionel Messi, fyrirliði og nýkrýndur heimsmeistari með argentínska landsliðinu í knattspyrnu birtir í dag, rétt fyrir sigurhátíð landsliðsins í Buenos Aires, hjartnæma færslu á samfélagsmiðlum þar sem hann fer yfir ferðalagið í átt að heimsmeistaratitlinum.
Messi segir mikið vatn hafa runnið til sjávar síðan að hann hóf feril sinn sem unglingaliðsleikmaður Grandoli í heimalandinu.
,,Frá Grandoli til Heimsmeistaramótsins í Katar hafa liðið næstum þrjátíu ár. Þrír áratugir þar sem knattspyrnan hefur fært mér margar gleðistundir en einnig sorgarstundir. Draumur minn hefur alltaf snúist um að verða heimsmeistari og ég vildi ekki hætta að reyna að láta þann draum rætast, jafnvel þó ég vissi að á endanum gæti vel verið að á endanum myndi hann ekki rætast.“
Hann segir þennan heimsmeistaratitil, þann þriðja í sögu Argentínu, einni vera fyrir þá landsliðsmenn sem náðu ekki að vinna þetta sögufræga mót.
,,Eins og leikmennirnir sem spiluðu á HM 2014 í Brasilíu, leikmenn sem áttu skilið að vinna eftir baráttu sína. Þeir vildu þetta jafn mikið og ég.“
Þessi titill sé einnig titill argentínsku knattspyrnugoðsagnarinnar Diego Armando Maradona.
,,Hann hvatti okkur áfram frá himnum.“
Þá þakkar Messi öllum þeim sem höfðu trú á liðinu þrátt fyrir að úrslitin hafi stundum ekki staðist væntingar.
,,Þeir sáu baráttuna og viljann sem við lögðum í þetta, jafnvel þótt hlutirnir færu okkur ekki í hag.“
Messi segir allan hópinn í kringum argentínska landsliðið eiga hrós skilið.
,,Það að hafa mistekist í nokkur skipti að ná takmarkinu var hluti af ferðalaginu og mikill lærdómur, án vonbrigða er vonlaust að ná árangri. Frá innstu hjartarótum, takk kærlega. Áfram Argentína!“
View this post on Instagram
