Helgi Seljan, blaðamaður á Stundinni, settist í settið í Íþróttavikunni með Benna Bó, sem sýnd er á Hringbraut á föstudögum. Þar var einnig Hörður Snævar Jónsson, íþróttastjóri Torgs. 

Þar voru teknar fyrir fréttir vikunnar og meðal annars var farið yfir málin á bak við tjöldin í vináttulandsleik íslenska karlandsliðsins við Sádi-Arabíu í síðasta mánuði. 

„Það kom mörgum á óvart þegar við fórum að spila leikinn við Sádana. Þetta var ekki augljós kostur fyrir okkur og það hefði verið hægt að nýta þennan glugga betur. En þetta er það sem Sádar gera. Þeir kaupa landslið til að spila á móti sér,“ segir Helgi, en Stundin fjallaði einmitt um það í síðustu viku að KSÍ hafi ekki fengið grænt ljóst frá Utanríkisráðuneytinu til að spila leikinn, þvert á það sem hafði verið haldið fram. 

„Það kom mér á óvart að KSÍ hafi verið búið að fullyrða að sambandið hafi fengið grænt ljós frá utanríkisráðuneytinu. Það snerist um allt annað mál.“ 

Hörður tekur til máls. „Þetta er ekki til fyrirmyndar. Það verður áhugavert að sjá ársreikning KSÍ, hvernig þetta verður falið. Aðrar tekjur er líklega það sem þetta verður sett undir. KSÍ er félögin í landinu og þau eiga að geta gert kröfu á að peningurinn sem hlýst af svona hvítþvotti skili sér til þeirra. 

KSÍ hefði bara getað sagt satt og rétt frá. Vera heiðarleg, það er það minnsta sem maður biður um.“ 

Helgi skilur ekki af hverju hlutirnir eru ekki upp á borðum í Laugardal. 

„Ég skil ekki alveg hvað er svona erfitt hjá Knattspyrnusambandinu. Allt sem viðkemur fjármálum er svolítið villta vestrið. Allt í einhverjum rassvasabókhöldum. Ég geri mér ekki grein fyrir því af hverju þetta er öðruvísi hér en annars staðar.“