Það kom upp ömurlegt atvik í Meistaradeild Evrópu á miðvikudag þegar Rico Lewis, sautján ára gamall leikmaður Manchester City, varð fyrir kynþáttaníði.
Það voru stuðningsmenn Sevilla sem voru með rasísk ummæli gagnvart Lewis. Nú hefur það verið staðfest að lögrgla hafi handtekið tvo stuðningsmenn spænska liðsins fyrir kynþáttaníð í garð Lewis.
Lewis lék í hægri bakverðinum fyrir Manchester City í 3-1 sigri á Sevilla. Hann skoraði fyrsta mark City í leiknum og jafnaði með því í 1-1.
Kappinn verður átján ára þann 21. nóvember og með markinu á miðvikudag varð hann yngsti leikmaður til að skora í fyrsta byrjunarliðsleik sínum í Meistaradeildinni.
City vann riðil sinn fremur örugglega. Borussia Dortmund fylgir þeim áfram í 16-liða úrslit.
Sevilla og Íslendingalið FC Kaupmannahafnar voru einnig í riðlinum sem um ræðir. Spænska liðið hafnaði í þriðja sæti og það danska á botninum.