Richard Keyes telur að tímasetningin á viðtali Piers Morgan við Cristiano Ronaldo á dögunum hafi verið slæm.

Viðtalið þótti afar umdeilt en þar lét Portúgalinn gamminn geisa. Hann lét mann og annan heyra það hjá Manchester United og yfirgaf í kjölfarið félagið.

Keyes var í viðtali hjá Morgan, ásamt Andy Gray, en þeir starfa sem sparkspekingar í katörsku höfuðborginni Doha eftir að hafa verið látnir fara frá Sky Sports fyrir kvenfyrirlitningu í beinni útsendingu.

„Ég tel að þetta hafi verið illa tímasett. Ef ég hefði verið þú hefði ég sagt: „Ég er meira en til í að setjast niður og tala við þig en við skulum bíða eftir að þú ert farinn frá félaginu. Við viljum ekki skemma arfleið þína,“ segir Keyes við Morgan.

Morgan er hins vegar ekki sammála því að orðsport Ronaldo á Old Trafford sé svert.

„Ég tel ekki að nokkrir mánuðir af vandamálum með Erik ten Hag og þjálfara sem hann hafði aldrei heyrt af í Rangnick skemmi arfleið Ronaldo.“