Ragnar Sigurðsson, fyrrum landsliðskempa og núverandi umboðsmaður fékk sér sæti í Íþróttavikunni með Benna Bó, sem sýnd er á Hringbraut alla föstudaga. Hörður Snævar Jónsson, íþróttastjóri Torgs, sat með Ragnari í settinu.

Hugsanleg sala Glazer-fjölskyldunnar á Manchester United var til umræðu, en í síðustu viku tilkynntu eigendurnir að þeir væri tilbúnir að selja félagið.

„Völlurinn er orðinn gamall og lélegur, æfingasvæðið orðið þreytt og félagið komið á eftir öllum utan vallar,“ segir Hörður um stöðu mála.

Benedikt spurði Ragnar þá út í upplifun sína af eigendum í atvinnumennskunni. Fyrrum miðvörðurinn segir eiganda Krasnodar, þar sem hann var frá 2014-2016, hafa skipt sér töluvert af.

„Hann kom allavega einu sinni, tvisvar í viku á þyrlu,“ segir Ragnar, sem lýsir mikilli bílaumferð í Krasnodar.

„Maður var stundum klukkutíma á leiðinni á æfingu þannig hann kom bara á þyrlu með tvo lífverði með sér.

Hann elskaði fótbolta og klúbbinn. Hann bjó það til 2007 eða 2008 þannig hann var með hjartað og sál í þessu, frábær maður.“

Það kom þó fyrir að eigandinn æsti sig.

„Hann kom einu sinni eða tvisvar inn í klefa eftir leik alveg brjálaður eftir að við töpuðum,“ segir Ragnar Sigurðsson.