Ragnar Sigurðsson, fyrrum landsliðskempa og núverandi umboðsmaður fékk sér sæti í Íþróttavikunni með Benna Bó, sem sýnd er á Hringbraut alla föstudaga. Hörður Snævar Jónsson, íþróttastjóri Torgs, sat með Ragnari í settinu.

Ragnar fór á dögunum til Senegal, þar sem hann hitti unga knattspyrnudrengi í erfiðri stöðu. Hann komst í tengsl við fólkið sem heldur úti heimilinu fyrir drengina í gegnum eiginkonu sína og var spurður hvort hann væri til í að fara út.

„Ég var til í það og þá var ekkert hægt að bakka út úr því, ekki að ég hafi viljað það. Ég fór að tala við alla sem ég þekkti hérna, því þeir eiga ekki neitt, safnaði skóm og fötum og svona,“ segir Ragnar.

„Það er verið að reyna að búa til framtíð fyrir þá.“

Ragnar vissi ekki hvað hann væri að fara út í en ferðin kom honum á óvart.

„Ég var svo stressaður um að mér yrði svo heitt þarna. Ég vissi ekkert hvað ég var að fara út í en þetta var bara ótrúlegt. Fyrsta daginn sé ég að þeir æfa á einhverjum sandvelli þar sem var bara rusl út um allt. Þetta voru hræðilegar aðstæður.

Þetta er tenging sem við erum komin með og mig langar að halda í.“

Ragnar lenti í smá vandræðum þegar hann kom inn í landið.

„Þeir sögðu mér að ég þyrfti ekki Visa en það var það fyrsta sem gæinn í búrinu spurði mig um. Það var smá vesen. Þeir þekktu einhvern þarna og gátu fengið einhvern til að koma og hjálpa mér inn í landið.“

Honum var boðinn bíll þegar hann lenti á flugvellinum. Hann vildi þó frekar fara með drengjunum ungu sem höfðu tekið svo vel á móti honum.

„Mér fannst það fáránlegt þannig ég fór í rútuna með strákunum og það var sungið og dansað og allt brjálað.

Ég á alveg pottþétt eftir að fara þangað aftur einhvern tímann,“ segir Ragnar Sigurðsson.

Hann ræðir ferðina ítarlega í spilaranum hér að neðan.