Ragnar Sigurðsson, fyrrum landsliðskempa og núverandi umboðsmaður fékk sér sæti í Íþróttavikunni með Benna Bó, sem sýnd er á Hringbraut alla föstudaga. Hörður Snævar Jónsson, íþróttastjóri Torgs, sat með Ragnari í settinu en þeir fóru yfir fréttir vikunnar.

Það skýrðist í vikunni að Cristiano Ronaldo er búinn að yfirgefa Manchester United. Það kom umsjónarmanni þáttarins á óvart hversu vel var staðið að starfslokum Ronaldo hjá félaginu. „Þetta var óumflýjanlegt og þetta var vilji beggja. Ronaldo hafði engan áhuga að vera þarna og Manchester United vildi ekkert hafa hann þarna,“ sagði Hörður og bætti við að Portúgalinn sé ekki alveg að sætta sig við að hann sé kominn að endalokum ferilsins.

Hann spurði Ragnar hvernig sú tilfinning væri. Að endalokin væru komin. „Mér var alltaf sagt af eldri leikmönnum að spila eins lengi og möguleiki væri. Maður ætti eftir að sakna þess.

En fyrir mig var það alls ekki þannig. Ég var búinn að vera með æluna upp í kok í einhver tvö eða þrjú ár. Að mæta á hverjum degi, fara á endalausa fundi, vera í þessum fötum eða hinum, fara þangað og hlaupa hingað. Því ef maður gerir ekki það sem manni er sagt er það vesen. Ég var alveg kominn á það að komast út úr þessu. En ég var að passa mig að hætta ekki of snemma.“

Vinir og fjölskylda kvöttu hann til dáða og sögðu honum að reyna áfram. „En loksins sagði ég að ég gæti ekki meir og þegar það var klárt þá var eins og það færu 50 kíló af bakinu. Mér var mjög létt.“

Hann benti á að honum væri allavega ekki enn farið að leiðast í lífinu og sakni atvinnumannaumhverfisins ekki neitt. „Það var frábær ákvörðun að hætta og hefði alveg mátt gerast fyrr.“