Chancel Mbemba, varnarmaður Marseille, viðurkennir að leikmenn liðsins hafi ekki vitað að jafntefli gegn Tottenham í Meistaradeild Evrópu í gær hefði dugað þeim inn í Evrópudeildina.
Tottenham átti afar dapran fyrri hálfleik og var verðskuldað 1-0 undir eftir hann. Clement Lenglet jafnaði hins vegar leikinn snemma í seinni hálfleik og í blálokin tryggði Pierre-Emile Hojbjerg Spurs sigur, eftir að Marseille hafði hent öllum sínum leikmönnum fram völlinn í von um það að komast í 16-liða úrslit.
Marseille getur kannski nagað sig í handabökin fyrir að skilja ekki eitthvað af leikmönnum eftir í vörn því tapið þýddi að Marseille hafnar í neðsta sæti riðilsins í stað þess þriðja.
Með sigrinum vann Tottenham riðil sinn og fer í 16-liða úrslit, ásamt Frankfurt, sem hafnaði í öðru sæti. Sporting var í því þriðja og fer í Evrópudeildina. Marseille er úr leik í Evrópu þetta árið.
„Þeir á bekknum vissi hvernig staðan var hjá Sporting. Það voru samskiptaerfiðleikar á milli okkar,“ segir Mbemba, en Sporting tapaði sínum leik.
Igor Tudor, stjóri Marseille segir að leikmenn hafi ekki heyrt í sér. „Það var svo mikill hávaði. Ég sagði þeim að bakka, ekki fara fram. Þeir heyrðu ekki í mér.“
