Valur taldi eftir leiktímabilið 2021 í efstu deild karla að krafta Hannesar væri ekki lengur óskað, þó svo að hann ætti ár eftir af samningi sínum. Félagið fékk til sín Guy Smit frá Leikni R. í stað landsliðsmarkvarðarins fyrrverandi.
„Þetta kom algjörlega eins og þruma úr heiðskíru lofti. Á dauða mínum átti ég von en ekki þessu. Það hafði gengið mjög vel þessi tvö ár,“ segir Hannes í Chess After Dark.
„Ég frétti af þessu daginn eftir síðasta leik í gegnum fjölmiðla. Þá fór ég að kynna mér þetta og kemst að því að það væri löngu búið að ganga frá þessu og að það ætti að halda því frá minni vitneskju. Þá fýkur svolítið í mig og ég reyni að ganga á menn og komast að því hvað væri í gangi.“
Hannes segir það hafa verið óþarfi hversu ljótur viðskilnaðurinn við Val var. „Þetta er bara ótrúlega leiðinlegt mál fyrir alla sem komu að því. Þetta hefði aldrei þurft að fara í þetta.“
Hann viðurkennir að hann hafi verið vonsvikinn með þátt Heimis Guðjónssonar, þá þjálfara Vals, í málinu.
„Ég stóð í þeirri trú að okkar samband væri fínt. Hann hafði reynst mér að mörgu leyti vel sem þjálfari Vals. Ég hnippti í hann kvöldið sem síðasti leikur tímabilsins fór fram og sagði að ef hann vildi setjast niður og ræða hvað mætti fara betur og þess háttar fyrir næsta tímabil væri ég meira en til. Það samtal fór auðvitað aldrei lengra. Það gerir mann enn meira hissa á að þetta hafi farið svona. Fyrst að þetta var einhver tilfinning sem hann greinilega hefur haft. Það er eitthvað sem hefði tekið eitt spjall að rétta af.
Þetta hefði getað verið tæklað á allt annan hátt. Ég ber virðingu fyrir því sem Heimir hefur gert á sínum þjálfaraferli. En ég er ekki að neita því að framkoma hans í þessu máli litar mjög það álit sem ég hafði á honum. Maður sér það í svolítið öðru ljósi núna.“
Hannes var ekki sá eini sem var hissa þegar hann fékk fregnir af því að hann fengi ekki að vera áfram í Val.
„Þetta kom ekki bara flatt upp á mig heldur allan leikmannahópinn. Ég held þú getir spurt hvern einasta leikmann í þessum klefa út í hvernig stemningin var þarna og mitt viðhorf. Ég bar svolítið á herðunum allt sem við vorum að gera utan vallar, að skipuleggja ferðir eða eitthvað í félagslífinu.“
Það var lítið um svör frá Val dagana eftir brottför Hannesar og ýmsar sögur fóru á kreik.
„Ég veit ekki hvað ég er ekki búinn að heyra að ég hafi átt að gera í þessum klefa. Það er auðvitað hundleiðinlegt að hlusta á svoleiðis þegar það er ekki fótur fyrir neinu af því.
Ég heyrði ekkert frá Val fyrr en einhverjum þremur dögum eftir að þetta er komið í loftið. Ég var búinn að reyna að hafa samband við alla þarna. Síðan kemur símtal þar sem er farið mjög stuttlega yfir þetta. Það var kannski það sem kveikti mest í púðurtunnunni.“
Hannes hefur seinna meir rætt við Börk Edvardsson, formann Vals.
„Við Börkur erum búnir að tala saman síðan. Eins ósáttur og ég var við hann á þeim tíma þá er þetta ekkert annað en eitt símtal til að róa málin. Ég hef engan áhuga á að standa í einhverju stríði við fólk sem ég kann vel við. Við Börkur heilsumst og spjöllum þegar við hittumst. Við gerðum upp okkar mál,“ segir Hannes Þór Halldórsson.
