Það var af nægu að taka í Íþróttavikunni með Benna Bó sem var á dagskrá Hringbrautar á föstudagskvöld. Hörður Snævar Jónsson, íþróttastjóri Torgs og Tómas Þór Þórðarson, ritstjóri enska boltans hjá Símanum voru gestir þáttarins.
Þar barst talið að íslensku knattspyrnugoðsögninni Eiði Smára Guðjohnsen en í vikunni tjáði einn besti vinur hans, Sveppi sig um Eið í hlaðvarpsþættinum Chess After Dark.
Í þættinum varpaði hann ljósi á það hversu þekktur Eiður Smári í raun og veru sé eftir atvinnumannaferil sinn í knattspyrnu.
Tómas Þór vinnur náið með Eiði Smára í kringum enska boltann hjá Símanum og voru þeir saman í Lundúnum um síðustu helgi, meðal annars á leik Chelsea og Arsenal á gamla heimavelli Eiðs.
Benedikt Bóas, umsjónarmaður Íþróttavikunnar var forvitinn um það hvernig væri að vera með Eið á þessum stöðum.
,,Þetta slapp til núna vegna þess við vorum mættir snemma á Stamford Bridge af því að þetta var hádegisleikur,“ svaraði Tómas Þór.
Allt annað hafi hins vegar verið upp á teningnum þegar að hann fór með Eiði Smára á Chelsea – Manchester United árið 2020.
,,Fyrir þessa leiki er götunum lokað fyrr og lengra frá vellinum. Við vorum þá að mæta á völlinn svona tveimur og hálfum tíma fyrir leik.
Þegar að Eiður stígur út úr leigubílnum tekur hann sixpensarann niður og svo er bara sett í sjöunda gír og strunsað að leikvanginum því ef einhver kemur auga á hann og stoppar hann tefjumst við um klukkutíma.“
Þá vilji margir eiga samskipti við Eið þegar inn á leikvanginn er komið.
,,Þar sem að við stöndum þarna, við hliðarlínu vallarins að hita upp fyrir leikinn, stendur bara hópur fólks nokkrum metrum frá okkur hinum megin við myndavélina og það er bara allt vitlaust þegar að þau koma auga á Eið Smára.
Hann kemst heldur ekki til baka inn í blaðamannaaðstöðuna. Án þess að vera ýkja þá myndi hann þurfa að sitja fyrir á svona 70 myndum með stuðningsmönnum en af því að hann er að flýta sér þá eru þetta svona 30 myndir.“
Fólk lýsi því yfir í samtölum við hann að Eiður sé þeirra mesta hetja, goðsögn.
,,Þá er það ekki bara það. Virðingin sem Eiður Smári hefur frá fyrrum kollegum er einnig mikil. Þeir alveg sópast að honum.“
Það var ansi þétt dagskrá hjá Tómasi Þór, Eiði Smára og Bjarna Viðarssyni um síðustu helgi en þeir byrjuðu daginn á Stamford Bridge þar sem þeir hituðu upp fyrir leik Chelsea og Arsenal og þurftu síðan að flýta sér Tottenham Hotspur leikvanginn að hita upp fyrir leik Tottenham og Chelsea.
Það stóð ekki á svörum hjá Tómasi Þór er hann var spurður að því hvernig þeir félagarnir ferðuðust á milli leikvanga í Lundúnum.
,,Í leigubíl,“ var svar hans.
