Matthías Vilhjálmsson hefur tekið ákvörð un um að ganga í raðir bikarmeistara Víkings. Þetta herma heimildir 433.is.

Samningur Matthíasar við FH var að renna út en félagið hafði áhuga á að halda honum. Heimir Guðjónsson þjálfari liðsins tók við FH í vikunni.

Matthías mun hins vegar skrifa undir í Víkinni þar sem fyrrum samherji hans, Arnar Gunnlaugsson er þjálfari liðsins.

Arnar hefur ekki farið í felur með áhuga sinn á sóknarmanninum knáa sem hefur ákveðið að yfirgefa FH.

Matthías er 35 ára gamall en eftir níu ár í atvinnumennsku snéri hann heim í FH fyrir tímabilið 2021.

Þegar FH var upp við vegg í sumar og framtíð félagsins í efstu deild í hættu steig Matthías upp. Hann skoraði þrennu í mikilvægum sigri á Leikni undir lok móts sem hjálpaði FH að halda sér í deildinni.