Mikel Arteta, stjóri Arsenal, hefur gefið í skyn að hann þurfi að breikka leikmannahóp sinn í félagaskiptaglugganum í janúar.

Arsenal datt úr leik í enska deildabikarnum í gær með 1-3 tapi gegn Brighton á heimavelli. Arteta gerði tíu breytingar fyrir leik og náðu þeir leikmennirnir sem komu inn margir hverjir ekki að nýta tækifæri sitt nógu vel.

„Við munum þurfa að skoða hvaða möguleika við höfum og skoða hvað er í boði,“ segir spænski stjórinn um janúargluggann.

„Þetta er hópurinn sem við erum með. Við verðum að reyna að nota hann eins vel og hægt er en í kvöld (í gærkvöldi) gekk þetta ekki.“

Arsenal er á toppi ensku úrvalsdeildarinnar, tveimur stigum á undan Manchester City. Síðarnefnda liðið er með mun stærri hóp og ljóst er að Arsenal gæti þurft að stækka hópinn sinn ef Skytturnar ætla að halda í við City.

„Ég hef sagt það áður að hópurinn er lítill,“ segir Mikel Arteta.