Alexis Sanchez getur ekki beðið eftir því að mæta Tottenham á nýjan leik er lið hans, Marseille, tekur á móti enska liðinu í Meistaradeild Evrópu.
Mikil spenna er í D-riðli Meistaradeildarinnar. Tottenham er í efsta sæti með átta stig. Þar á eftir koma Sporting og Frankfurt með sjö og loks Marseille með sex. Það getur því allt gerst í kvöld, en á sama tíma og Marseille mætir Tottenham tekur Sporting á móti Frankfurt.
Sanchez er þekktastur fyrir tíma sinn hjá Arsenal, þar sem hann var frábær frá 2014 til 2018. Hann tapaði aðeins einu sinni gegn erkifjendunum í Tottenham í sjö tilraunum með Skyttunum.
„Ég á frábærar minningar með öllum hjá félaginu, sérstaklega stuðningsmönnunum,“ segir Sanchez.
„Að vinna Spurs var alltaf frábær skemmtun. Það var sérstakt og minningarnar um það eru í hjarta mér.“
Sanchez er ekki eini leikmaður Marseille sem var áður hjá Arsenal. Sead Kolasinac, Matteo Guendouzi og Nuno Tavares eru einnig hjá Marseille.
