Sven-Goran Eriksson, fyrrum landsliðsþjálfari Englands, er með ráð fyrir Gareth Southgate, núverandi þjálfara liðsins.
Eriksson vill sjá Southgate velja bæði Trent Alexander Arnold og Joe Gomez í landsliðshópinn fyrir HM í Katar.
Möguleiki er á að leikmennirnir verði ekki valdir og þá sérstaklega Trent sem hefur legið undir verulegri gagnrýni á tímabilinu.
Báðir eru þeir leikmenn Liverpool sem hefur ekki byrjað deildarkeppnina vel og er nú þegar tíu stigum frá toppsætinu.
Eriksson myndi þó veðja á þessa tvo leikmenn og er möguleiki að Southgate geri það sama.
,,Það er mikið talað um Trent en ég myndi velja hann í hópinn því það er hægt að velja 26 leikmenn. Það er nýtt. Ég held að hann henti því hann er góður í föstum leikatriðum og að gefa boltann fyrir. Ég er ekki viss um hvaða leikkerfi verður notað en hann hefur alltaf verið mjög mikilvægur fyrir Liverpool,“ sagði Eriksson.
,,Ég er mjög hrifinn af Trent, ég veit að hann er ekki besti bakvörður heims varnarlega en hann er nútíma sóknarsinnaður bakvörður.“
,,Ég myndi líka taka Gomez, hann er góður leikmaður. Hann er mjög stöðugur, harður og einn af þeim sem á sjaldan slæma leiki.“
