Steven Gerrard, stjóri Aston Villa, hefur tjáð sig um miðjumanninn Douglas Luiz sem var á óskalista Arsenal í sumar.

Arsenal reyndi að fá Luiz í sínar raðir á gluggadeginum en hann hefur hingað til neitað að framlengja samning sinn á Villa Park.

Gerrard segir að það sé ekkert að frétta af framlengingu leikmannsins en að hann sé að gera vel með liðinu þrátt fyrir að hafa verið opinn fyrir því að kveðja í sumar.

,,Það eru engar fréttir af framlengingunni, svo staðan hefur ekkert breyst. Hann er þó einbeittur og æfir vel,“ sagði Gerrard.

,,Er ég hissa á þessum sögusögnum? Nei, því við erum með ungan brasilískan leikmann sem er mjög hæfileikaríkur. Ég býst við að heyra þessa spurningu margoft á tímabilinu.“

,,Við viljum halda honum hérna, ég held að eigendurnir séu að gera mikið til að láta verða úr því. Við vildum ekki missa hann á lokadegi gluggans og hann hefur spilað vel síðan þá.“

Enski boltinn á 433 er í boði